Endrit Yzeiraj, Zëvendësministrit të Ekonomisë, Kulturës dhe Inovacionit (Board Member)
“Nevoja është nëna e inovacionit” është një nga shprehjet më të përdorura për të shpjeguar ciklin e vazhdueshëm të shpikjeve dhe inovacionit që qëndron në thelb të zhvillimit të vazhdueshëm ekonomik që njerëzimi përjeton prej thuajse 200 vjetësh tashmë. Çdo shpikje e suksesshme, çdo përmirësim i proceseve të mëparshme, çdo sipërmarrës që ka sjellë një produkt ose shërbim të ri në treg, e ka bërë për t’iu përgjigjur një nevoje apo kërkese të tregut.
Sot tregu shqiptar ka më shumë nevojë se kurrë të inovojë, përmirësojë dhe modernizojë produktet dhe shërbimet e ofruara në tregun e saj për të paktën tre arsye thelbësore:
Së pari, modeli ekonomik shqiptar i krijuar pas tranzicionit të viteve 90 – i cili arriti të rrisë ndjeshëm standardet e jetesës – po tregon shenjat të limiteve të tij. Për të arritur standardet e jetesës së vendeve evropiane, ekonomia shqiptare ka nevojë për një transformim të mëtejshëm.
Së dyti, konkurrenca nga sipërmarrjet e rajonit dhe të BE – ku Shqipëria synon dhe është në proces integrimi – do detyrojë sipërmarrjet tona të përmirësohen ose të zhduken.
Së treti, profesionistët e rinj shqiptarë, që kanë talentin dhe aftësinë për të punuar me risitë më të fundit të fushave të tyre, nëse nuk u ofrohet kjo mundësi ne vend, do e kërkojnë atë gjithmonë e me shpesh jashtë tij, duke përforcuar kështu trendin demografik të zvogëlimit të popullsisë.
Edicioni i tretë i “40 under 40” është kësisoj një moment i mirë për të vlerësuar ato sipërmarrje të reja që po i përgjigjen kësaj sfide dhe nevoje të kohës. E kam ndjekur me interes lindjen dhe zhvillimin e këtij projekti në dy edicionet e mëparshme dhe jam i nderuar të jap kontributin tim në edicionin e këtij viti.
Gama e fushave dhe sipërmarrjeve të përfshira në këtë vit është edhe më i gjerë se më parë, duke mbuluar që nga shërbimet e deri te manifaktura.
Zhvillimi më interesant dhe mbresëlënës, sidomos nën fokusin e një ekonomie që kërkon transformim dhe rritjen e konkurueshmërisë së saj, është numri i tregjeve të huaja që sipërmarrjet shqiptare po synojnë. Nëse pak vite më parë edhe shtrirja në tregjet e rajonit konsiderohej një sukses, tashmë rastet e kompanive shqiptare që synojnë tregjet perëndimorë është gjithmonë e me i madh.
Kjo tregon se aftësia dhe talenti sipërmarrës i profesionistëve shqiptarë është i padiskutueshëm. Ajo çka politikëbërësit duhet te sigurohen të krijojnë është një ambient ku këto talente dhe aftësi mund të lulëzojnë, dhe këtë po përpiqemi të arrijmë çdo ditë!
I uroj pjesëmarrësve të këtij viti jo vetëm suksese të mëtejshme por shpresoj që shembulli i tyre të jetë frymëzim dhe për edicionet e radhës të “40 under 40” në mënyrë që ekonomia dhe sipërmarrjet shqiptare të arrijnë nivele gjithmonë e më të larta!
