Të bësh biznes në Shqipëri nuk është aspak e lehtë – dhe këtë e dëshmon edhe historia e Klantin Osmanit, i cili u rendit i 7-ti në listën e “40 Under 40”.
Klantini kishte planifikuar të ishte pjesë e eventit për të marrë çmimin dhe për të festuar këtë arritje me ne. Por, në ditën e eventit, ai u gjend në Gjermani për shkak të një situate të papritur në biznes: një nga kamionët që transportonte lëndë të parë pësoi vonesa, duke e detyruar atë të qëndronte jashtë vendit për të menaxhuar situatën.
Megjithatë, mungesa e tij fizike nuk e zbeh aspak rëndësinë e arritjes. Siç e theksoi edhe profesor Artani gjatë fjalës së tij, Klantini përfaqëson me dinjitet brezin e tretë të sipërmarrësve në Shqipëri – një trashëgimi e fortë që vazhdon të rritet dhe të zhvillohet.
Në skenë, çmimin në emër të tij e pranoi vajza e Klantinit, e cila mbajti edhe një fjalë përshëndetëse emocionuese, duke dëshmuar se rruga e sipërmarrjes po vazhdon të frymëzojë edhe brezat e rinj.
