Në edicionin e këtij viti të “40 Under 40”, vendin e 6-të e zuri Flori Uka – themelues dhe drejtues i Uka Farm dhe Uka Wine.
Flori e përshkruan industrinë ku ai operon si një fushë të bukur dhe të lidhur ngushtë me natyrën. Rrënjët e kësaj historie nisin nga pasioni i babait të tij, Rexhe Uka, për natyrën, kërkimin shkencor dhe akademinë. Aty ku dikur ekzistonte një “laborator” kërkimor, Flori arriti ta kthejë në një biznes të qëndrueshëm dhe me ndikim.
Uka Wine është tashmë e vlerësuar nga shumë institucione ndërkombëtare, duke treguar se përkushtimi, tradita dhe inovacioni mund të ecin krah për krah.
Megjithatë, sipas Florit, investimi në bujqësi nuk është i lehtë: rezultatet nuk vijnë menjëherë. Kërkohet durim, pritje dhe shpesh përballje me humbje të mëdha. “Sfidat kanë qenë të mëdha, por unë jam nga ata njerëz që besojnë se Shqipëria do të bëhet. Kam shumë ëndrra të mëdha,” – shprehet ai me bindje.
Historia e Florit është një shembull frymëzues se si pasioni dhe besimi tek potenciali i vendit mund të kthehen në projekte që sjellin vlerë jo vetëm në treg, por edhe në identitetin e bujqësisë shqiptare.
