Ardita Bonatti, Menaxhere Projekti në RYCO, prej vitit 2019 udhëheq me pasion dhe profesionalizëm projektin RISE, një iniciativë që fokusohet në sipërmarrjen sociale në rajon dhe është krijuar posaçërisht për gjeneratën e re të sipërmarrësve. Programi ka rezultuar mjaft i suksesshëm, duke ndihmuar dhjetëra të rinj të regjistrojnë bizneset e tyre si ndërmarrje të vogla në tregun rajonal.
Ajo që e bën RISE të veçantë është mbështetja afatgjatë: edhe pas përfundimit të fazës së parë të financimit, programi vazhdon t’i ndjekë dhe t’i mbështesë startup-et përmes rrjetit “Alumni RISE”, duke i ofruar mundësi zhvillimi, bashkëpunimi dhe rritjeje të qëndrueshme.
Në muajin qershor, Ardita ishte pjesë e panairit Expo 40 under 40 që u zhvillua në Tiranë. Në këtë event, RISE u përfaqësua nga tre startup-e tashmë të regjistruara në treg, të cilat vazhdojnë të mbështeten dhe të mentorohen nga programi. Kjo prezencë tregoi edhe njëherë fuqinë e bashkëpunimit dhe rëndësinë e mbështetjes së vazhdueshme për të rinjtë që duan të bëjnë ndryshim në komunitetet e tyre.
