Arbi Bamllari është renditur në Top 10 të edicionit “40 Under 40”, një listë e ngushtë që vlerëson sipërmarrësit më të spikatur të rajonit. Ky vlerësim është një nder i madh për të, por edhe një kënaqësi e veçantë për t’u bërë pjesë e një rrugëtimi të tillë inspirues.
Në fjalën e tij, Arbi shprehu mirënjohjen për ekipet e bizneseve që ai ka themeluar, si Sky Tech dhe 3D Sky, të cilat e kanë mbështetur edhe në idetë më “të çmendura”, duke i kthyer ato në realitet. Një falënderim i veçantë iu kushtua familjes, dhe sidomos babait të tij – i cili është edhe ortaku i tij në biznes. “Shpesh figura e babait është ai heroi i heshtur që nuk merr vëmendjen e duhur,” u shpreh Arbi me emocion.
Ai nuk la pa përmendur as partnerët dhe klientët e parë që besuan tek ai, por edhe ata që nuk e mbështetën: “Sepse më dhanë mundësinë t’ju tregoj që me këmbëngulje gjithçka është e mundur.”
Në mesazhin e tij drejtuar brezit të ri, Arbi nënvizoi rëndësinë e qëndrimit në Shqipëri dhe forcën e talentit shqiptar:
“Ne mund të kemi mungesa në sistem, por kurrsesi jo në talent. Ne jemi ata që do të bëjmë ndryshimin. Është shumë e rëndësishme të luftoni për idetë tuaja.”
Ai solli shembullin e vet personal, duke treguar se nga 50 ide që kishte shkruar deri në moshën 18-vjeçare, ka arritur të realizojë dy prej tyre dhe është tashmë duke punuar për të tretën.
Arbi Bamllari, një histori frymëzuese që dëshmon se me pasion, këmbëngulje dhe besim tek vetja, ëndrrat mund të bëhen realitet.
